تو اوریا مقبول جان صاحب کا بڑا بھلا ہوجاتا۔
ایک تو احباب نے ان سوڈو انٹیلیکچولز کے لنک بھیج بھیج کر ناک میں دم کر رکھا ہے اوربندہ مروت میں یہ بھی نہیں کہ سکتا کہ بھائ، ایسی بے پرکی تو ہم نے مظہر کلیم سے بھی نا سنی، آپ کو ذرا احساس تو ہونا چاہیے کہ یہ نادان دوست ہم اصحاب میمنہ کو کس قدر مضحکہ خیز دفاعی پوزیشن میں لا کھڑا کرتے ہیں؟ تحقیق سے ان کو کوئ واسطہ ہو نا ہوکہ ہر ایک کو اپنی راے کا حق ہے لیکن بقول شخصے، اپنے حقائق کا نہیں۔ کم از کم ڈالڈا ملاتے ہوے کچھ تو خیال کریں کہ اس تکنیکی دور میں انکی اس بے سروپا باتوں کو جھٹلانا اور جھوٹے کو گھر تک چھوڑ کر آنا کس قدر آسان ہے۔
تو محترم کا یہ کالم ایک برقی ڈاک میں ملا۔ مزاح پڑھ کر طبعیت باغ باغ ہو گئ کہ یہ دفاعی میکینزم ہے۔ اگر خون جلانا شروع کریں تو قومی اخبار ختم ہونے سے پہلے بلند فشار خون کی بنا پر جان جان آفرین کے سپرد ہوجائے۔اب اسکا پہلا پیراگراف پڑھیں اورمندرجہ ذیل ویڈیو دیکھ لیں، پھر بتائیں کہ یہ سلیمانی ٹوپی پہنے ہوئے پلسی کہاں چھپے ہیں جنہوں نے بقول جان صاحب کے “اسے دھکیل کر پیچھے کر دیا”؟
Marlon Brando’s Oscar® win for ” The Godfather” by WhiteWolf-Cree
اب اس مضحکہ خیز کالم کا دوسرا پیراگراف پڑھیں اور سر پیٹیں۔ جان صاحب، اگر تھوڑی سی تحقیق کر لیتے تو نو اینڈ ان سایٹ، عراق فار سیل، عراق ان فریگمنٹس، ریتھنک افغانستان، انسائڈ گواتنامو، انسائڈ عراق، اینڈ آف امریکہ، بش وار، رولز آف انگیجمنٹ، انڈیپینڈنٹ انٹروینشن, فارن ہایٹ نائن الیون اور اس جیسی بیسیوں ڈاکومنٹریز مل جاتیں جن پر عراق و افغانستان میں ہونے والے مظالم پر روشنی ڈالی گئی ہے اورامریکی جارحیت پر کھل کر تنقید کی گئ ہے۔ سب چھوڑیں، ٹیکسی ٹو دی ڈارک سائڈ جیسی رلا دینے والی دستاویزی فلم جو عراق افغانستان و گوانتناموبے میں امریکی مظالم سے کو بے نقاب کرتی ہے ۲۰۰۷ میں آسکر ملا۔ آپ کو پینٹاگان پیپرز بھی کسی قطار و شمار میں نظر نا آتی ہوگی کہ حقیقت سے آپکی تحاریر کا موضع بھی نہیں ملتا۔ آپ کو ایوارڈ یافتہ و نامزد ڈاکومنٹریز میں یقینا وار گیم، اینڈرسن پلاٹون،بروکن رینبو، ہیل فائر جرنی فرام ہیروشیما، ہو کلڈ ونسنٹ چن ، فور لٹل گرلز بھی نظر نا آئ ہونگی۔ بس اب مزید کچھ کہنے سننے کی سکت کہاں بس اتنا کہتا چلوں کہ اگر آپ کو محترمہ شرمین عبید کا ایورڈ لینا پسند نہیں تو نا سہی، حالات و واقعات میں دروغ گوئ سے کام لیے بغیر بھی یہ مدعا آرام سے بیان کیا جا سکتا ہے۔ نیز شرمین عبید کو یہ ایوارڈ ایک امریکی ڈائریکٹر ڈینیل ینگی کے ساتھ ملا ہے، مارلن برانڈو کی طرح ان کی تن تنہا اداکاری پر نہیں، اب بے چارے ینگی کا کیا قصور جان صاحب کہ وہ بھی ایوارڈ کو ٹھوکر مار دے۔آپ کی دروغ گوئ پر ہمارا تو کچھ ایسا ہی عالم ہے کہ
حیراں ہوں، دل کو روؤں کہ پیٹوں جگر کو مَیں
مقدور ہو تو ساتھ رکھوں نوحہ گر کو مَیں
بہت عمدگی سے آپ نے نشاندہی کی ہے۔ لگتا ہے اوریا مقبول جان نے حقیقت میں تھوڑا مرچ مصالحہ لگانے کی کوشش کی ہے/۔ میں اس بات سے مکمل اتفاق کرتا ہوں کہ غلو سے کام لیے بغیر بھی اپنی بات کی جاسکتی ہے اس بات سے بھی اتفاق ہے کہ پولرائزیشن کے اس دور میں بھی سوچنے والے اور اظہار رائے کی آزادیوں پر یقین رکھنے والے پولرائزڈ نہیں ہیں۔
لیکن کیا یہ حیرت کی بات نہیں ہے کہ مین اسٹریم میڈیا میں ۹/۱۱ سے متعلق کسی بھی ڈاکیومینٹری کو کسی بھی قسم کی تعریف یا توصیف حاصل نہیں ہوسکی۔ لوز چینج یا رپل افیکٹ ۹/۱۱ دم بخود کردینے والی ڈاکیومینٹریز تھیں ان ڈاکیومینٹریز نے سرکاری کہانی کے تارو پود بکھیر کر رکھ دیے تھے اور امریکی رائے عامہ کی اکثریت کو اس حوالے سے تبدیل کرکے رکھ دیا مگر ان ڈاکیومینٹریز کو کسی بھی قسم کا ایوارڈ نہیں دیا گیا اور انکی حقیقت سینہ با سینہ پھیلنے والی داستان کی سی بن گئی۔
کچھ تو ہے جسکی پردہ داری ہے
تبصرے کا بہت شکریہ جواد خان صاحب۔
آپ نے جو پولرآزیشن کی بات کی ہے وہ بہت اہم ہے اور آپ کے وسیع المطالعہ ہونے پر دلالت کرتی ہے، خصوصا امریکی معاشرے کے ضمن میں۔نیز آپ یہ بھی دیکھ سکتے ہیں کہ مین اسٹریم میں اس سازشی نظریے پر کوئ دستاویزی فلم نا بن پائ، لوز چینج توایک حاشیہ فلم ہے جس پر گفتگو کا پنڈورا بکس کھولنا اس تبصرے میں ممکن نا ہوگا، لیکن محض اس کی پروڈکشن کوالٹی اور مواد کے معیار کو خالصتا دستاویزی تناظر میں دیکھا جاے تو اس کے لیے آسکر کی نامزدگی کا حصول ناممکن نہیں تو نہایت مشکل ضرور تھا- اس کے برعکس ‘ٹیکسی ٹو دا ڈارک سایڈ’ جو امریکی جارحیت اور عراق کے مظالم پر مبنی ایک نہایت اہم فلم ہےجو کہ۲۰۰۸ میں بہترین ڈاکومنٹری کا اعزاز پا سکی۔ آپکی بات بلکل درست ہے کہ مائکل مور جیسے دستاویزی فلمساز جن کی بولنگ فار کولمبائن کو آسکر مل چکا ہے، انکی ۹/۱۱ پر مبنی فلم فارنہائٹ ۹/۱۱ کو بھی اکیڈمی کی آشیرباد حاصل نا ہوئ۔ لیکن یہ فلم نہایت کامیاب ہوئ ، اسے کانزفیسٹیول میں ایوارڈ ملا نیز جنوری ۲۰۰۵ کے اعداد و شمار کے مطابق یہ فلم تقریبا دنیا بھر میں 120 ملین ڈالر اور امریکی باکس آفس پر 220 ملین ڈالر کی رقم کما چکی ہے جو ایک سیاسی فلم کے لئے دنیا بھر میں ایک بڑی رقم تھی.۔ اس فلم کو آسکر کی نامزدگی حاصل نا ہونے پر بھی بڑی ناک بھوں چڑائ گئی تھی جو بالکل حق بجانب تھی لیکن اسطرح کی صورتحال دیگر کئی اہم دستاویزی فلموں مثلا ویٹنگ فار سپرمین، تھن بلو لاین، راجر اینڈ می، ٹچنگ دا وائڈ، ہوپ ڈریمز، اور دی انٹرپٹرز کے ساتھ بھی رہی، خصوصا ویٹنگ فار سپرمین تو امریکی نظام تعلیم کی شکست و ریخت پر بنی نہایت ہی بہترین دستاویزی فلم ہے اور اسے بھی اکیڈمی نے گھاس نا ڈالی۔ لہذا اگر ہم کازیشن از ناٹ کورریلیشن کے نظریے کو سامنے رکھیں یہ واضع ہوتا ہے کہ اس نامزدگی کے عمل میں شاید سازشی نظریہ کم اور پولرایزیشن زیادہ ہے۔
محترم۔ اردوکالم نویس اور حقائق اس طرح ساتھ ساتھ نہیں چل سکتے جس طرح آپ چلانا چاہ رہے ہیں۔ مارکیٹ میں ڈیمانڈ اسی سنسنی خیزی اور کہانی نویسی کی ہے چاہے اس کے لیے غیر مرئی کردار ہی کیوں نا تخلیق کرنے پڑیں یا تاریخی واقعات میں تھوڑا اور اس خصوصی کیس میں خاصا ردو بدل کرنا پڑے۔ اب کیونکہ زیادہ تر قارئین آپ کی طرح تنقیدی جائزہ لینے یا واقعات کی تصدیق کرنے کے ٹنٹے میں نہیں پڑتے چناچہ آپ کو ایسی ای میلز وصول ہوتی رہیں گی اور ردعمل کی نفسیات کی شکار ایک اکثریت ردعمل دکھاتی رہے گی۔
[ازراہ مزاق]
اب اگر میں آپ کو اردو کالم نویسی میں نسیم حجازی کے اثرات کی بابت کچھ عرض کروں گا تو باعث نفرین ٹہروں گا کیوں کہ لوگ شہاب نامہ کو بھی حقیقت سمجھ کر پڑتے ہیں چناچہ اس طرح کے کالم تو اعزازی ڈاکٹریٹ کے مستحق قرار پائیں گے۔ اور ڈاکٹر صاحب اسے تھوڑا مرچ مصالحہ قرار دیں گے حالانکہ چاٹ انتہائی تیکھی ہے۔
[/ازراہ مزاق]